Kamis, 19 Agustus 2010

Jameun Ka Canggeh

Alhamdulillah pujo keu Tuhan
yang peu jeut alam, leupah geunaseh
seulawuet saleum ateuh jonjongan
Rasul pilihan hate cukop gleh.

haba ku teleh keu inong agam
haba Ku pulang keu bandum wareh
adak neu baca neu timang - timang 
puteh ngon hitam neu pileh - pileh.

bek jeut keu desya geutanyo insan
meuah lon layang ngon hate puteh
adak teu singgong hate di dalam
peumeah rijang di lon peunuleh.

haba lon tuleh keu wayang - wayang 
saboh harapan bek neu peu jaeh
han got bandum kadang got sikan
ta cok tasimpan jeut keupeunuleh

adak hana got haba karangan
tacok bandum nyan ta boh ju keudeh
bek jeut keu desya di ulon tuan 
azeub bak Tuhan cokup tat peudeh.

beuleun limong blah cahya cukop trang
leumah ku pandang bintang meulampeh
oh taeu jameun cukop tat sayang
inong ngon agam iman ka lipeh

beutoy geu peugah le ureung awam
hudep beuseunang jino beumeuceh
timu - utara, barat - selatan 
ureung meu iman teupileh - pileh

kleung ngon tiwah ka saboh kawan
manok ngon musang ka saboh binteh
tikoh deungon mie laen lom macam
oh wate malam sapat bak di ehh

meunan keuh tamse jino ta pandang 
lam pergaulan jameun ka canggeh
kon salah manok kon salah musang 
cit salah bak kandang han meulabang binteh.

di naeuk dara pih saboh macam
geu sok pakean tat lipeh - lipeh
siliweu puntong, baje ketat bak badan
dua blah macam beudak meulampeh

geusok bak gaki seupatu manyang
gaya ta pandang sang awak inggreh
oh wate suepot jak jalan - jalan
lam kawan bujang peudeuh pa puteh.

oh uro minggu meu seunang - senang 
dara ngon bujang melampeh - lampeh
ka awai janji jak jalan - jalan
adek ngon abang jak peuleuh gaseh

dara teumanyong ho bang tujuan 
seot si bujang sabang cukop gleh
poma ngon ayah geu larang pih tan
yang peunteng seunang si nyak puteh gleh

menan keu jino wate ta pandang
lam pergaulan jameun ka canggeh
jadeh beurangkat dara ngon bujang 
keu deuh u sabang bak minggu habeh 

sideh di sabang han peu ta pandang 
gob mano seni telanjang meukutang budaya inggreh
pakkon si dara dengon si bujang 
mano dua - duaan rab teusuet habeh

pajan geu puwo oh ka lee malam
lueh pajoh - pajoh kacang bak jambo blah jeh
troh u rumoh poma tat senang 
geu keun bak si bujang peulueh geunaseh 

wate geu teugah le rakan - rakan 
di mak si intan geu bantah habeh
malah geu seuot, kah peu kah paham
nyo pergaulan jameun ka canggeh

pajan teu keujot oh ka geu peuban
ka hawa yang masam - masam ngon gule cabeh
disinan baro di beudoh mumang
keu neuk peukawen rijang sinyak puteh gleh

u kanto polisi jak peugot urusan
nyo goh si bujang geu plueng blahdeh jeh
u konto pak geucik geukeun han bereh
u kanto kalporesh surat geu tindeh........................

meunan keuh bago jino hai rakan
larangan tuhan ka geu peu jaeh
wate ta kalon cukop lom sayang 
inong ngon agam Iman ka lipeh..............................:) :) :)


Tidak ada komentar:

Posting Komentar